拼字

 

請用以下資料，拼作句子：

人體篇～

膚指胃：骹胰毛淚，髀齒脛耳。

（夫子謂：教而無類，彼此敬矣。）

姓氏篇～

魯龔，陸沈童程李武錢龔劉！

（老公，六嬸同情你無錢供樓！）

殷衞史廖林蔡袁，羅白香朴甘田 。

（因為屎尿淋菜園，蘿蔔香樸甘甜。）

植物篇～

莁菇菰，荖芎稗菠豉樺！

（無辜辜，老公俾波士話！）

荖櫇梧杹梉櫻荄蒜杞蒴！

（老婆唔化妝應該算幾索！）

樟棶蒔，梧枲荑笳稔蔇！

（將來事，唔駛而家諗嘅！）

動物篇～金

蝗獅虎鷺鼥鷦鼲麒！

（黃師傅怒拔招魂旗！）

猬鱔蛆狢，蝠蚰魷龜！

（為善最樂，福有攸歸！）

改朝換代

公司彷如一國家，時而世易會變化，一代起來一代下，有權力者來稱霸。

新君上場必有變，有人無端會升遷，有人沒錯都被貶，職位調動轉坤乾。

制度亦會有所更，從前方式會改陣，不能下下將舊跟， 唔適應你盞頭痕。

門面點都要翻新，就算大嘅唔變身，小小修改必實行，一於剷走舊觀感。

以前有時鬆到暈，今日或者收好緊，新官起步火焚焚，殺一儆百有可能。

 又或派糖得民心，小小恩惠作和親，又或查帳一大份，把柄前朝不翻身。

最怕在上有鬥爭，殺錯多少的良民，你我都是小基層，偏偏將人嚟作梗。

未知各位網友們，是否嘗過朝代搬？不知是悲還是歡？分享一下互解悶。

馬氏奇談

本人姓馬名蟻，人馬座，家住馬灣，聽人話姓馬都好容易做小生，好似馬德鐘、馬浚偉、馬國明，於是趁住馬年，馬上報考訓練班，諗住一定成馬到功成，將來發展萬馬奔騰。點知入到電視台都係做牛做馬，做埋啲馬賊甲、馬伕乙、牛頭馬面嘅角色，最叻都係扮馬騮精個替身；反而喺馬來西亞出世個師妹胭脂馬，識拍馬屁，馬住咗個監製，結果由扮馬姐做到刀馬旦主角，佢仲成日馬後炮咁講自己係黑馬，遲早一馬當先，大紅大紫。我諗唔喥我會馬失前蹄，縱然我有白馬王子咁個樣貎，識得一字馬咁嘅功夫，都唔及人哋，雖然演技馬馬虎虎，但都蔡翁失馬，真係叫我個大男人都流馬尿！最後馬死落地行，走去馬交，碰下其他運氣，結果學咗造馬仔，生意竟然車水馬龍，最後咁係－臨崖勒馬好馬不吃回頭草。見返個青梅竹馬個馬尾妹，於是去咗馬賽註冊結婚，人生生涯想唔到會同娛樂圈風馬牛不相及，雖然以後金馬奬都與我無緣，但我好享受宜家躍馬馳騁充實嘅生活。

新年新菜筵

炸麵包糠撈牛腱絲~喻意：健健康康

津白猴頭菇片拌滷味~喻意：白頭到老

鴨掌，鳳爪，熏蹄拼盤~喻意：滿足

吉仔汁肉腸吞拿魚意粉~喻意：吉祥如意

香脆蒜辣雞髀雞翼加碎蓮子鳳梨汁~喻意：比翼連理

昆布捲星型蘿蔔榚天婦羅~喻意：步步高升

甘筍紅菜頭火腿絲沙律加紫菜碎~喻意：紅到發紫

甜品-竽頭糖水、葿豆榚、馬仔及蓮子酥~喻意：馬年由頭甜到尾

新春對聯

中港矛盾暫放下
兩地同暢迎新歲
橫批~和諧賀年 

雙宿同棲添暖意
隻身獨遊享自由
橫批~各隨喜好 

建創家業耀祖先
買喥層樓娶老婆
橫批~願望成真 

開開心心自給自足
健健康康無病無痛
橫批~平順是福 

男人豪氣~彷如千百丈里
女士芳容~仍是十八年華
橫批~各得其所 

一元投資獲千倍利
兩口相愛擁萬種情
橫批~事事如意 

老闆管理事事有人性
同事合作樣樣無問題
橫批~開心上班 

無論大小 每家人平平安安
不分高低 各階層安安樂樂
橫批~國泰民喜

蟻氏又再圖文字

 沒有背過別人走過，無論怎樣的路程，也會遺留一種缺陷。

 執子之手的多，執父之手的少，有機會便抓緊吧！

 偶然的不同，都是一種喜悅。

 趁有機會，想想開心的事物，偷偷微笑吧！

縱然沒有色彩，只要心中璀璨，便是美。

有人說想孤舟獨行，但看著他的雙杖，就知他內心期望有伴同往！

 看到軍人，發現，有時外表的「型」與內在的「傷」是剛好相反。

不要怕，人生路上，總有不知名的守望者。

訪問

以下是阿美（假名）的真實個案，為保護當事人，整個訪問內容會經特別聲音處理：
記＝記者 　美＝阿美

記：初初點解妳會嘗試第一次？
美：啲Fan叫囉，佢哋話會好high、好興奮。而者自己又後生，諗住試下都無妨，點知．．．
記：以前有冇人提過妳會產生嘅後遺症？
美：有，不過可能自己任性，未必會聽人講！加上自己又以為人哋係咁啫，自己唔一定會！
記：咁試咗之後，對妳有乜影響？
美：好大影響，好辛苦，而家工都返唔喥！
記：屋企人點睇？
美：佢哋都幫我，不過幫得一時唔幫得一世！
記：有咩嘢不適？
美：心煩、好攰、瞓唔喥。
記：對將來點打算？
美：見步行步，儘量安排可以做喥嗰啲嘢，但係都無乜信心，相信都係聽天由命！
記：以過來人嘅身份，妳有乜嘢想同大家講？
美：唔．．．．．．想嘗試生第一胎嘅人真係要諗清楚，唔好啲人話生BB好high就生，又唔好諗住自己唔會怪獸化，最終辛苦只會係自己，為佢舖路真係令你斗唔喥氣！真係唔好立亂決定．．．．．．