金庸迷擇偶條件

女金庸迷期望夫婿：

有楊　過嘅情心一意
有郭　靖嘅誠實可靠
有康　熙嘅顯赫背境
有韋小寶嘅氹人開心
有段　譽嘅溫婉斯文
有喬　峰嘅男子氣概
有張無忌嘅掦名立萬
有令狐沖嘅爽朗瀟灑
有乾　隆嘅鴻圖大略
有陳家洛嘅才華滿溢
有胡　裴嘅俠義心腸

男金庸迷理想女友：

有小龍女嘅清麗脫俗
有黃　蓉嘅聰明伶俐
有雙　兒嘅順服聽話
有建　寧嘅顯赫背境
有天山童姥嘅不老顏容
有王語嫣嘅知識廣博
有曾　柔嘅溫柔嫻熟
有任盈盈嘅大情大性
有香香公主嘅純真善良

講嘢說明條例

經過多年研究，有關「講嘢及談話說明條例」條訂條款已於即日起生效。如有人士觸犯以下行為，即屬違法，最高懲罰可判睇蟻俠網誌一年：

１）誤導性遺漏
例子）我娶我老婆前，佢無提過佢大我十年～ 若某人故意不將真實資料向有關當事人披露，即構成誤導成份。

２）具威嚇性講嘢行為
例子）老闆話佢係老闆，所以佢講啲嘢我一定要照做～凡以權力、地位、身份等等高檔次程度壓逼低檔次程度，一律列作威嚇行為。

３）餌誘式吹水
例子）我網友話佢樣靚身材正，結果大把人追～不得誇大其詞作利誘，然而事實與所表明的有出入。

４）先誘後轉講嘢行為
例子）老豆講明我考喥十名內去歐洲旅行，結果去咗潮州～承諾人不能先以一個較吸引的應允作誘餌，最終卻以較次等獎賞來代替。

５）不適當地承諾
例子） 阿媽叫我執房，我話得閒會搞～有關承諾必須在合理時間內完成，不能拖拉了事。

６）有根據說明　
例子）有人話蟻俠花心～必先有數據或專業研究報告支持，不能無憑失實傳遞。

劇本翻譯

原有文本

甲（聽手電）：九龍灣地鐵站七仔等啦！
乙：邊個搵你？咁長氣。用iphone whatsapp俾佢咪得囉！
甲：我個fan，有個LV袋，九成新，佢話唔要，平平哋賣俾我啫！
乙：家下如果仲有時間，不如去麥記食個包先啦？
甲：都好，順便覆覆facebook。
乙：今日睇蘋果，話李亞鵬同王菲離婚喎！
甲：真定假嫁？東方好似無講喎！
乙：珍珠都無咁真！唔信可以睇蟻俠個blog，佢有詳細講。

電視劇本

甲（聽手電）：九龍灣港鐵站便利店等啦！
乙：邊個搵你？咁長氣。用智能電話嘅聯絡群組通知佢咪得囉！
甲：我個fan，有個L字頭名牌袋，九成新，佢話唔要，平平哋賣俾我啫！
乙：家下如果仲有時奸，不如去美式快餐店食個包先啦？
甲：都好，順便覆覆個社交網絡。
乙：今日睇生果報，話郭靖同天后離婚喎！
甲：真定假嫁？方向報好似無講喎！
乙：珍珠都無咁真！唔信可以睇蟻俠個網誌，佢有詳細講。

中秋燈謎時間

中秋燈謎時間

1) 首爾來函 (猜一秦漢人物)

2) 千里相連、陰的反面 (猜一節日)

3) 唔好放開 (猜一食品)

4) 舌厲 (猜一四字成語)

5) 大多一點、好得一邊 (猜一港鐵站)

6) 49、64 (猜一四字成語)

7) 蕃邦癲了 (猜一藝人名字)

8) 匹丨二力 (猜一四字成語)

答案

1)韓信 2)重陽 3)DONUT (DON'T 甩) 4)千變萬化 5)太子 6)七七八八 7)胡楓 (瘋) 8)四分五裂

問

人生四苦悲　生老兼病死　為何須經過　活出甜酸味
嬰孩一出世　如四時更替　成長便開始　困難亦相繼
讀書忙學習　工作忙職責　勞勞一生過　無休止掙扎
生之為何物　似進入課室　不斷在建立　體會得與失
明白何謂愛　公義應何在　了解善與美　從苦中看開
病中痛呻吟　呼喊為何生　提示要珍惜　要珍惜光陰
健康要感恩　無病要興奮　不放縱胡混　做好己本份
你我沒超能　災害無預感　可突然臨近　把握每一分
別壯年以後　老便要出頭　身體漸衰退　似哀歌鳴奏
但哀歌抑揚　激昂又流暢　歷練成名曲　傾情惹回響
身體雖軟弱　生命卻閃爍　活過大半生　豐盛滿筵桌
面對要離去　總易流傷淚　唯留下榜樣　光輝仍結聚
不朽如春雷　令人醒不醉　生命將延續　子孫永跟隨

兩代用語翻譯篇

現代的一段對白：

甲：之前妳好爆潮嫁，點解呢排咁OUT，好樣衰下喎？
乙：衰忙囉！公司揸弗人好賤，無嘢做都要人OT，成日都遲放幾粒鐘，邊度唧喥時間出嚟買靚衫啫！
甲：妳老細好過份啫，班靚個look殘，做嘢都無mood啦！
乙：佢就係扮收唔喥喎！唔好講個衰人．．．妳好似識咗個富二代喎，係咪好有米先？
甲：咪講佢啦，散咗啦！佢係乜鬼富二代，老作扮嘢夾咋！
乙：超慘啊！
甲：咁又唔係，我後尾又識咗個帥哥劉公子，佢好冧我嫁！
乙：執到啦妳！





用六、七年代用語翻譯給公公、婆婆聽：

甲：啦妳講，妳前排咁摩登，呢排乜解究搞成咁，變咗咁老套，唔係好見得人喎？
乙：家下得閒死唔得閒病！我個事頭無乜人性，明明好清閒，過咗放工時間都要人哋上班，邊有時間去行公司喎！
甲：妳波士都好過太下喎，手下唔省鏡，做嘢無心機啦！
乙：佢就係借咗聾耳陣對耳囉！唔好講嗰個無天裝勒，妳近屎好似識咗個二世祖，佢係咪好疊水嫁啫？
甲：咪提佢，分咗手啦！佢邊鼠係二世祖，光棍充闊佬咋嘛！
乙：悲哀！
甲：妳啦我定，我跟住又識咗個靚哥仔劉大少，佢不知幾愛我！
乙：咁妳發達啦！

暴發戶某甲

以下是某甲的對話：

對工人：「我對手好矜貴，唔會自己撩鼻屎嫁，請得你，梗要幫我清理埋鼻哥啦。」

對親戚：「我屋企個屎坑用咗法蘭西香水沖厠，寧捨香噴噴！」

對醫生：「既然要駁骨，就幫我鑲條999金啦！」

對校長：「我可以捐一筆錢俾學校，條件係我個仔要科科攞100分。」

對貧民：「呢啲嘢點食得．．．．．．我屋企隻阿旺都要食和牛先得囉！」

對侍應：「我要淨麵．．．．．．加少少黑松露同鵝肝醬！」

對街坊：「你無理由唔識我？我就係呢度最大嗰間豪華別墅個屋主。」

對棺材舖老闆：「要喺棺材底加個真絲綿墊－我唔瞓慣梗板個喎！」